تاجکستان میں ہونے والے انٹرنیشنل جوڈو ٹورنامنٹ کیلئے 6 رکنی ٹیم کا اعلان

اسلام آباد (اے پی پی) پاکستان جوڈو فیڈریشن نے رواں ماہ تاجکستان میں ہونے والے انٹر نیشنل جوڈو ٹورنامنٹ کیلئے 6 رکنی ٹیم کا اعلان کر دیا ہے جن میں 4کھلاڑی اور 2آفیشلز شامل ہیں۔ کھلاڑیوں میں شاہ حسین شاہ ، زنیر بٹ ، یوسف ریاض اور محمد رزاق جبکہ آفیشلز میں جمیل کھوکھر اور نبیل شامل ہیں۔ پاکستان جوڈو فیڈریشن کے سیکرٹری مسعود احمد خان نے اتوار کو اے پی پی کو بتایا کہ انٹر نیشنل جوڈو ٹورنامنٹ 6 سے7 اپریل تک تاجکستان میں منعقد ہوگا اور ایونٹ میں شرکت کیلئے قومی ٹیم 5 اپریل کو روانہ ہوگی ۔ انہوں نے کہا کہ ٹورنامنٹ کیلئے باصلاحیت کھلاڑیوں کا انتخاب کیا گیا ہے اور وہ پر امید ہیں کہ ایونٹ میں پاکستانی ٹیم کامیابی حاصل کریگی۔