سری لنکن بلائنڈ کرکٹ ٹیم آج دورہ پاکستان کیلئے پہنچے گی

لاہور(سپورٹس رپورٹر+نمائندہ سپورٹس) پاکستان بلائنڈ کرکٹ کونسل کی دعوت پر سری لنکا کی بلائنڈ کرکٹ ٹیم چھ میچوں کی سیریز کھیلنے کے لیے آج رات لاہور پہنچے گی۔ پاکستان بلائنڈ کرکٹ کونسل نے مہمان ٹیم کو پاکستان میں فول پروف سکیورٹی فراہم کرنے کی یقین دہانی کرائی تھی۔ پاکستان بلائنڈ کرکٹ کونسل کے چیئرمین سید سلطان شاہ کا کہنا تھا کہ سری لنکن بلائنڈ ٹیم کی پاکستان آمد اور سیریز کے انعقاد سے ملک کا سوفٹ امیج دنیا میں بہتر ہوگا کہ پاکستان کھیلوں کے حوالے سے ایک محفوظ ملک ہے۔ ان کا کہنا تھا کہ سری لنکن بلائنڈ ٹیم کے کھلاڑیوں اور آفیشلز پر مشتمل 18 رکنی وفد آج رات علامہ اقبال ائر پورٹ پہنچے گا۔ مہمان ٹیم دورہ پاکستان میں تین ٹی ٹونٹی اور تین ایک روزہ میچوں کی سیریز ملک کے مختلف شہروں میں کھیلے گی۔