برطانوی عدالت کا نیب کیخلاف براڈ شیٹ کے حق میں نیا فیصلہ 

لندن (مانیٹرنگ نیوز) برطانوی عدالت نے براڈ شیٹ کے حق میں نیا حکم دیتے ہوئے فرم کو فریزنگ آرڈر (اثاثے منجمد کرنے کا حکم نامہ)  براہ راست قومی احتساب بیورو (نیب) اور اٹارنی جنرل آف پاکستان کے دفاتر پہنچانے کی اجازت دے دی۔ رپورٹ کے مطابق برطانیہ میں نیب کی نمائندگی کرنے والے وکلا  2 ماہ سے براڈ شیٹ کو کوئی جواب نہیں دے رہے تھے جس کے سبب براڈ شیٹ کیس کے حوالے سے برطانیہ میں پاکستان کی قانونی نمائندگی نہیں رہی تھی۔ برطانوی فرم براڈ شیٹ نے ایک ملین پاؤنڈ کی بقایا رقم کے حصول کے لیے برطانیہ کی عدالت سے رابطہ کیا تھا جس پر عدالت نے براڈ شیٹ کے حق میں نیا حکم دے دیا ہے۔ خیال رہے کہ برطانوی ہائی کورٹ پہلے ہی یو بی ایل میں پاکستان کے اکاؤنٹس منجمد کرنے کے احکامات جاری کرچکی ہے۔ یو بی ایل تحریری طور پر مطلع کرچکا ہے کہ حکومت پاکستان کی تقریباً ایک ملین پاؤنڈ کی رقم ضبط کی جاچکی ہے۔ نیا حکم نامہ ہائی کورٹ کے ماسٹر ڈویژن کے کمرشل کورٹ کی طرف سے جاری ہوا ہے۔ براڈ شیٹ کی درخواست پر تھرڈ پارٹی ڈیبٹ آرڈرکی سماعت 30 جولائی کو ہونا ہے۔ سربراہ براڈ شیٹ کاوے موسوی نے کہا ہے کہ حکومت پاکستان نے ادائیگی نہ کرکے مزید اثاثے ضبط کرنے پر مجبور کیا ہے۔  پاکستان میں مقامی لا فرم کے توسط سے رواں ہفتے متعلقہ اداروں کو برطانوی ہائی کورٹ کے احکامات مل جائیں گے۔