سری نگر ہائی وے،قیام گاہ،بیت الخلاء کی تعمیراور شجرکاری مہم جاری 

اسلام آباد (وقائع نگار)سی ڈی اے انتظامیہ کی جانب سے سری نگر ہائی وے پر ریسٹ ایریا(قیام گاہ)،بیت الخلاء کی تعمیراور شجرکاری مہم زور و شور سے جاری ہے۔مذکورہ ہائی وے پر پشاور انٹر چینج کے تمام لوپ کی اسٹیٹ آف دی آرٹ لینڈ اسکیپنگ بھی مکمل کرلی گئی ہے۔جبکہ اگلے مرحلہ پر گولڑہ موڑ انٹر چینج کی لینڈ اسکیپنگ شروع کردی جائے گی۔تفصیلات کے مطابق سری نگرہائی وے پر دونوں اطراف مکمل پھولدار، پھلدار اور سایہ دار درخت اور پودے لگانے کاعمل جاری ہے۔جبکہ سری نگر ہائی وے کی سلوپ پرکریزیا،کچنار،سیپیم سمیت دیگرانتہا ئی خوبصورت درختوں کو مکمل پلاننگ کے ساتھ منظم انداز سے لگایا جارہا ہے۔پشاور موڑ انٹر چینج کی بیوٹیفکیشن کاکام بھی جلد مکمل ہونے والا ہے۔سرینا چوک پر انتہائی خوبصورت پھولوں کی پنیری لگائی جاچکی ہے۔جبکہ جی نائن،جی ٹین اور جی الیون چوکس پربھی جدید طرز کے شجرکاری کیلئے ڈیزائن بنائے جاچکے ہیں،سری نگر ہائی وے پر عوام کی سہولت کیلئے دوریسٹ ایریاز اورپورٹ ایبل بیت الخلاء بھی بنائے جارہے ہیں۔