اسلام آباد ائیرپورٹ پر پی آئی اے  کی کوئٹہ کی پرواز سے پرندہ ٹکرا گیا

اسلام آ باد (آئی این پی ) اسلام آباد ائیرپورٹ سے کوئٹہ کے لیے روانہ ہونے والی پی آئی اے کی پرواز سے پرندہ ٹکرا گیا تاہم خوش قسمتی سے طیارہ اور مسافر محفوظ رہے۔  ترجمان پی آئی اے کے مطابق پی آئی اے کی پرواز  پی کے 325 اسلام آباد سے کوئٹہ کے لیے روانہ ہوئی تو طیارے کے بلندی پکڑنے کے دوران پرندہ ٹکرا گیا۔ ائیر ٹریفک کنٹرول سے رابطہ کرنے پر اے ٹی سی نے پائلٹ کو واپس لینڈ کرنے کی ہدایت کی اور ائیر بس اے 321 طیارہ نے ٹیک آف کے 50 منٹ بعد اسلام آباد ائیر پورٹ پر باحفاظت لینڈنگ کی۔ ترجمان نے بتایا کہ معائنے کے بعد طیارے کو روک لیا گیا اور مسافروں کو متبادل طیارے سے منزل پر روانہ کیا گیا جبکہ کوئٹہ ائیرپورٹ پر پرواز پی کے 326 کے مسافروں کی روانگی کئی گھنٹے تاخیر کا شکار  ہوئی۔