سری لنکا نے بغیر سنچری ٹیسٹ کرکٹ کا سب سے بڑا سکور بنا دیا 

لاہور(سپورٹس رپورٹر)سری لنکا نے ٹیسٹ کرکٹ میں منفرد کارنامہ سر انجام دیدیا۔ان دنوں بنگلہ دیش کے دورے میں پر موجود سری لنکن کرکٹ ٹیم نے میزبان ٹیم کیخلاف چٹاگانگ میں کھیلے جارہے دوسرے ٹیسٹ میں بغیر کسی بیٹر کے سنچری سکور کیے ٹیسٹ کرکٹ کا سب سے بڑا سکور بنالیا۔سری لنکا نے بنگلہ دیش کے خلاف دوسرے ٹیسٹ میں ٹاس جیت کر بیٹنگ کا فیصلہ کیا اور پہلی اننگز میں پوری ٹیم 531 رنز بناکر ا?ؤٹ ہوگئی۔اس اننگز کی خاص بات یہ تھی کہ اتنے بڑے سکور میں کسی بھی بیٹر نے سنچری سکور نہیں کی۔سری لنکا کے 6 بیٹرز نے نصف سنچریاں بنائیں۔531 رنز ٹیسٹ کرکٹ میں بیٹرزکی جانب سے سنچری سکور کیے بغیر ٹیم کا سب سے بڑا مجموعی سکور ہے۔اس سے قبل ٹیسٹ میچ میں بغیر انفرادی سنچری سکور ہوئے ٹیم کا سب سے بڑا سکور 524 تھا جو بھارت نے 1976 ء میں نیوزی لینڈ کیخلاف بنایا تھا۔