لاہور(سپورٹس رپورٹر)پاکستان کرکٹ بورڈ نے پاکستان کرکٹ ٹیم کے بیٹر بابر اعظم کو دوبارہ ون ڈے اور ٹی ٹونٹی کا کپتان مقرر کردیا۔پی سی بی کی جانب سے ایکس پر جاری اعلامیہ میں کہا گیا کہ پی سی بی کی سلیکشن کمیٹی کی متفقہ تجویز کے بعد چیئرمین پی سی بی محسن نقوی نے بابر اعظم کو قومی کرکٹ ٹیم کا وائٹ بال (ون ڈے اور ٹی ٹونٹی)کپتان مقرر کر دیا۔یاد رہے کہ گزشتہ روز پی سی بی نے بابر اعظم کو ایک بار پھر ٹی 20 اور ون ڈے ٹیم کا کپتان بنانے کی پیشکش کی تھی جبکہ بابر نے تینوں فارمیٹ کی کپتانی دینے کا مطالبہ کیا تھا۔ پی سی بی بابر اعظم کو وائٹ بال ٹیم کا کپتان بنانا چاہتا تھا تاہم بابر اعظم نے تینوں فارمیٹ کی قیادت کا مطالبہ کیا تھا۔ذرائع نے بتایا کہ اس حوالے سے مزید بات چیت کیلئے پی سی بی سلیکشن کمیٹی کے اراکین نے کاکول جاکر بابر اعظم سے ملاقات کا فیصلہ کیا۔ ذرائع نے موجودہ ٹی 20کپتان شاہین آفریدی سے متعلق دعویٰ کیا تھا کہ وہ کپتان کی تبدیلی کی خبروں سے ناخوش ہیں۔پاکستان کرکٹ بورڈ نے کہا ہے کہ ایک سٹریٹجک اقدام کے تحت جس کا مقصد کھلاڑیوں کی اعلیٰ کارکردگی کو یقینی بنانا تھا، پی سی بی نے وائٹ بال کی قیادت کو تبدیل کیا ہے۔ بین الاقوامی کرکٹ میں شاندار بیٹنگ کے ریکارڈ کیلئے مشہوربابراعظم شاہین شاہ آفریدی سے کپتانی سنبھالیں گے۔ شاہین آفریدی نے بلاشبہ خود کو ایک سٹار فاسٹ بائولر ثابت کیا ہے اور انہوں نے کئی برسوں سے پاکستان کے پیس اٹیک کی قیادت کی ہے ، پاکستان کرکٹ بورڈ ان کی بہترین کارکردگی کو برقرار رکھنے کیلئے روٹیشن اور آرام کی اہمیت کو سمجھتا ہے۔ یہ فیصلہ کھلاڑیوں کے لمبے کیریئر اور خاص کر فاسٹ بائولرز کو انجریز سے بچانے کے ضمن میں بورڈ کے عزم سے مطابقت رکھتا ہے۔ ورک لوڈ مینجمنٹ کو مدنظر رکھتے ہوئے یہ فیصلہ اس بات کو یقینی بنانے کیلئے ہے کہ پی سی بی کے اہم بائولرز اپنے کھیل میں نمایاں رہیں۔ بورڈ نہیں چاہتا کہ قومی ٹیم بائولنگ کے وسائل کے حوالے سے انجریز کے بحران سے دوچار ہو جیسا کہ آئی سی سی ٹی ٹونٹی ورلڈ کپ 2022 ء سے پہلے دیکھا گیا تھا جہاں شاہین کی دیکھ بھال کرنی پڑی تھی اور آئی سی سی ون ڈے کرکٹ ورلڈ کپ 2023 ء میں جب ٹیم کونسیم شاہ کی خدمات حاصل نہیں تھیں۔بابر اعظم نے قومی کرکٹ ٹیم کی دوبارہ کپتانی ملنے پر کہا ہے کہ حالیہ ٹی ٹونٹی سیریز میں شاہین کی قیادت میں کھیلنا خوشی کی بات تھی۔شاہین ابھی جوان ہیں اور ایک کھلاڑی اور لیڈر کے طور پر ہر روز بہتر ہو رہے ہیں،بحیثیت کپتان میں نے ہمیشہ شاہین کے مشوروں کی قدر کی ہے۔میں آگے بڑھتے ہوئے اہم فیصلوںکیلئے شاہین سے مشورہ کرتا رہوں گا، ہمیں کھیل کے بارے میں ان کی سٹریٹجک سمجھ سے فائدہ اٹھانا چاہیے،ہمارا مشترکہ مقصد اس ٹیم کو دنیا کی بہترین ٹیم بنانا ہے۔