شیخوپورہ+ نارووال+ وہاڑی+ بہاولپور (نمائندہ نوائے وقت+ نامہ نگاران) نوازشریف کیساتھ اظہار یکجہتی کیلئے شیخوپورہ‘ نارووال‘ وہاڑی‘ بہاولپور میں ریلیاں نکالی گئیں۔ شیخوپورہ سے نمائندہ نوائے وقت کے مطابق مسلم لیگ (ن)منیارٹی ونگ کے ضلعی جنرل سیکرٹری چوہدری وسیم انجم سندھو نے کہا ہے مسلم لیگ (ن) پوری طرح متحد ہے اور انشاء اللہ اس اتحاد سے سازشیوں کے تمام منصوبوں کو ناکام بنائیں گے۔ خورشید شاہ ہمیشہ پیپلزپارٹی کے لئے خطرہ بنے ہوئے ہیں، عمران خان اور خورشید شاہ نے ہمیشہ جمہوریت کے خلاف سازشیں کی ہیں اور آمریت کا ساتھ دیا ہے۔ ان خیالات کا اظہار انہوں نے نوازشریف زندہ باد ریلی کے شرکاء سے خطاب کرتے ہوئے کیا۔ اس موقع پر پارٹی رہنمائوں وکارکنوں کی بڑی تعداد موجود تھی، وسیم انجم سندھو نے کہا عمران خان ملک کی ترقی کی راہ روکنا چاہتے ہیں، وہ پھر جلسے کرکے ملک میں افراتفری پیدا کرنا چاہتے ہیں، عمران خان ملک کو انتشار میں نہ دھکیلیں، پہلے ہی قوم کا بہت وقت ضائع کردیا ہے اور اب وہ قوم پر رحم کریں۔ نارووال میں عوامی طاقت کے کا مظاہرہ کیلئے نوجوانوں نے موٹرسائیکل اور کاروں پر ریلی نکالی اور سابق وزیراعظم کے ساتھ اظہار یکجہتی کیا۔ ریلی سابق وفاقی وزیر احسن اقبال، صوبائی پارلمانی سیکرٹری خواجہ محمد وسیم بٹ کی قیادت میں نکالی گئی ریلی کے بعد اجتماع سے خطاب کرتے ہوئے احسن اقبال نے کہا جس طرح نواز شریف کو وزارت عظمیٰ سے فارغ کیا گیا اس طرح تو درجہ چہارم کے ملازم کو بھی فارغ نہیں کیا جاتا۔ عمران خان کے جلسے میں مشرف کی ٹیپ چلا کر ساری فلم واضح ہوگئی کہ اصل ڈائریکٹر مشرف اور عمران خان اس کا ایک اداکار ہے۔ انہوں نے کہا سپریم کورٹ کے فیصلے سے زخم نواز شریف کو نہیں لگا بلکہ 20کروڑ عوام کو دکھ پہنچا ہے۔ مسلم لیگ ن اپنے کیس کا دفاع کرے گی ۔ سپریم کورٹ کے فل بینچ کو اپنے ہی فیصلے پر سوموٹو لینا پڑے گا یہ فیصلہ عوام میں ایک مذاق بن گیا۔ وہاڑی میں یونین کونسل نمبر10کے زیر اہتمام نواز شریف ، شہباز شریف سے اظہار یکجہتی کرتے ہوئے ریلی نکالی گئی جس کی قیادت سابق ناظم حاجی بہادر خاں گجر نے کی جبکہ ریلی میں یوسی کونسلرز ، معزز ین علاقہ اور مسلم لیگی کارکنوں کی کثیر تعداد نے شرکت کی۔ اس موقع پر نوازشریف ، شہباز شریف سے اظہارِ یکجہتی کرتے ہوئے نعرے بازی کی گئی، ریلی پر شہریوں ، تا جروں نے پتیاں نچھاور کیں۔ بہاولپور میں مسلم لیگ (ن) کی طرف سے نواز شریف کے حق میں میونسپل کارپوریشن سے ختم نبوت چوک تک ریلی نکالی گئی جس کی قیادت میئر میونسپل کارپوریشن عقیل نجم ہاشمی، سابق ایم پی اے سمیع اللہ چوہدری و دیگر کر رہے تھے۔ ریلی کے شرکاء نے جھنڈے اور پلے کارڈ اُٹھا رکھے تھے۔ وہ نواز شریف اور مسلم لیگ (ن)کے حق میں نعرے لگاتے رہے۔ ختم نبوت چوک پر ریلی کے شرکاء سے خطاب کرتے ہوئے عقیل نجم ہاشمی، سمیع اللہ چوہدری، فوزیہ ایوب قریشی و دیگر نے کہا 2018ء میں نواز شریف کے قیادت میں نیا سورج طلو ع ہوگا۔