پاکستان کی بھارت کو کلبھوشن یادیو تک قونصلررسائی دینے کی باضابطہ پیشکش

پاکستان نے بھارت کو جاسوس کمانڈر کلبھوشن یادیو تک قونصلر رسائی کی باضابطہ طور پر پیشکش کر دی ۔دفتر خارجہ اسلام آباد میں ہفتہ وار میڈیا بریفنگ کے دوران ترجمان دفتر خارجہ محمد فیصل نے کہا کہ کلبھوشن یادیو کو قونصلررسائی دینے پر کام ہو رہا ہے ،اس سلسلے میں عالمی عدالت کے فیصلے کے مطابق اقدامات کئے جا رہے ہیں۔ بھارت کو قونصلررسائی سے متعلق جمعہ کو آگاہ کر دیا گیا ،قونصلر رسائی کی فراہمی سے متعلق بھارت کے جواب کا انتظار ہے۔ترجمان دفتر خارجہ نے کہا  کہ پاکستان طالبان کے ساتھ مذاکرات میں نیک نیتی کے ساتھ سہولت کار کا کردار ادا کر رہاہے، پاکستان کے افغانستان مفاہمتی عمل میں مثبت کردار کی بین الاقومی برادری نے تعریف کی، طالبان کے ساتھ وزیراعظم کے مذاکرات پر کام ہو رہا ہے۔امریکی صدر کے ممکنہ دورہ پاکستان سے متعلق ڈاکٹر محمد فیصل نے کہا کہ امریکی صدر ڈونلڈ ٹرمپ کے دورہ پاکستان پر کام ہو رہا ہے تاہم حتمی تاریخ کے بارے میں ابھی کچھ نہیں کہا جا سکتا۔