لاہور (خصوصی نامہ نگار) چودھری شجاعت حسین، سپیکر پنجاب اسمبلی چودھری پرویز الٰہی اور مونس الٰہی ایم این اے نے عیدالاضحی پر اپنے پیغامات میں کہا ہے کہ کرونا سے نجات اور اپنی آئندہ نسلوں کو بھی اس سے محفوظ رکھنے کیلئے ہمیں اللہ تعالیٰ کے حضور گڑگڑا کر دعائیں مانگنی چاہئیں اور اپنے گناہوں، کوتاہیوں پر معافی کا طلبگار ہونا چاہئے۔ چودھری شجاعت حسین نے کہا کہ اللہ تعالیٰ قرآن پاک میں فرماتا ہے کہ میں کیوں تم پر عذاب نازل کروں گا اگر تم میری اطاعت اور میرے احکامات کی پابندی کرو گے لیکن لوگوں نے ایسا نہیں کیا، خود کو سپر پاور کہنے اور اپنے میزائلوں، مہلک ہتھیاروں پر انحصار کرنے والوں نے اسے اپنی چودھراہٹ کا معیار بنا رکھا تھا جو اب ختم اور ان کا تمام جنگی ساز و سامان بے کار ہو چکا ہے، اب ان کے اربوں کے یہ میزائل لوہے کے بھاؤ بھی نہیں بکیں گے، ان تمام حالات کے پیش نظر ہمیں چاہئے کہ اللہ تعالیٰ سے دعا کریں کہ وہ ہمیں معاف کر دے اور ہمارے گناہوں اور کوتاہیوں سے درگزر فرمائے۔ اس موقع پر ہمیں تمام مظلوم مسلمانوں بالخصوص کشمیریوں کیلئے دعا کرنی چاہئے اور مقبوضہ کشمیر میں ہماری بچیوں پر جو ظلم و زیادتی بھارتی فوج کر رہی ہے انہیں اس سے نجات حاصل ہو۔ چودھری پرویزالٰہی نے کہا کہ آج ہم سب کو مل کر اللہ کریم سے دعا کرنی چاہئے کہ وہ کرونا کی وبا سے ہماری پوری قوم، بچوں اور آئندہ نسلوں کو اس سے محفوظ فرمائے، مقبوضہ کشمیر میں نوجوانوں کا جو خون بہہ رہا ہے وہ رنگ لا کر رہے گا اور آزادی ان کا مقدر بنے گی اور انہیں بھارتی ظلم و ستم سے نجات ملے گی۔