اسلام آباد (نمائندہ خصوصی) بلاول بھٹو زرداری کی سربراہی میں آزاد کشمیر میں پی پی پی کے ٹکٹ ہولڈرز کا اجلاس ہوا۔ فریال تالپور، نیر بخاری، فرحت اللہ بابر، راجہ پرویز اشرف، لطیف اکبر اور فیصل راٹھوربھی شریک ہوئے۔ بلاول بھٹو زرداری کو آزاد کشمیر میں پی پی پی کے ٹکٹ ہولڈرز نے انتظامیہ کی جانب سے کی جانے والی دھاندلی کی کوششوں سے آگاہ کیا۔ بلاول بھٹو نے آزاد کشمیر انتخابات میں زبردست مقابلہ کرنے پر پی پی پی ٹکٹ ہولڈرز کو شاباش دی اور ہدایت کی کہ عوام میں رہ کر مسائل کو اجاگر کریں اور ان مسائل کے حل کے اقدامات کریں۔ بلاول بھٹو زرداری سے عوامی نیشنل پارٹی خیبر پی کے کے صدر ایمل ولی خان نے  زرداری ہاؤس  میں ملاقات کی۔ بلاول نے ایمل ولی خان سے اسفند یار ولی کی خیریت بھی دریافت کی۔ افغانستان کی صورت حال اور اس کے ملک میں اثرات پر بات چیت کی ،چیئرمین بلاول بھٹو زرداری اور ایمل ولی خان کا خطے میں امن کے حوالے سے افغانستان میں استحکام ہونے کے معاملے پر اتفاق کیا اور سیاسی صورت حال پر بھی تبادلہ خیال  کیا گیا۔ ہم خیال سیاسی جماعتوں کی مشترکہ جدوجہد کے حوالے سے بھی گفتگو ہوئی۔