بابر اعظم کی ٹیسٹ رینکنگ میں ترقی‘ ٹی ٹونٹی میں تنزلی 

لاہور(سپورٹس رپورٹر)انٹرنیشنل کرکٹ کونسل نے ٹیسٹ اور ٹی ٹونٹی پلیئرز کی رینکنگ جاری کر دی، بابر اعظم کی ٹیسٹ رینکنگ میں ترقی اور ٹی ٹونٹی میں تنزلی ہوئی ہے۔انگلینڈ کے جو روٹ نمبر ون ٹیسٹ بیٹر بن گئے، انہوں نے پہلی پوزیشن نیوزی لینڈ کے کین ولیمسن سے چھینی ہے، جو ایک درجے تنزلی کے بعد دوسرے نمبر پر آگئے ہیں۔پاکستان کے بابر اعظم ایک درجے ترقی کے بعد تیسرے نمبر پر آگئے جبکہ نیوزی لینڈ کے ڈیرل مچل چوتھے نمبر پر ہیں۔سٹیوسمتھ، روہت شرما ایک ایک درجہ بہتری کے بعد پانچویں اور چھٹے نمبر پر پہنچ گئے ہیں۔ٹیسٹ بائولرز کی رینکنگ میں روی چندرن ایشون کی پہلی پوزیشن برقرار جبکہ جوش ہیزل ووڈ دوسرے اور جسپریت بمرا کی تیسرے نمبر پر موجود ہے۔ٹیسٹ آل راؤنڈرز رینکنگ میں رویندرا جدیجہ کی پہلی پوزیشن برقرار ہے۔ٹی ٹونٹی بیٹنگ رینکنگ میں آسٹریلیا کے ٹریوس ہیڈ کی پہلی پوزیشن برقرار جبکہ بابر اعظم ایک درجہ تنزلی کے بعد پانچویں پوزیشن پر چلے گئے ہیں۔سوریا کمار یادیو کی دوسری، فل سالٹ تیسری، یشسوی جیسوال کی چوتھی جبکہ محمد رضوان کی بھی ایک درجہ تنزلی ہوئی  اور وہ چھٹے نمبر پر چلے گئے ہیں۔ آل راؤنڈرز رینکنگ میں آسٹریلیا کے مارکس سٹوئنس پہلے نمبر پر آگئے، سکندر رضا ایک درجہ بہتری کے بعد دوسرے اور شکیب الحسن تیسرے نمبر پر پہنچ گئے ہیں۔سری لنکا کی وانندر ہسارانگا 2 درجہ تنزلی کے بعد چوتھے نمبر پر پہنچ گئے ہیں۔