لاہور (نامہ نگار) لاہور کے علاقے گرین ٹاﺅن میں موٹر سائیکل سوار تین مشکوک افراد نے روکنے پر اندھا دھند فائرنگ کرکے تین پولیس کانسٹیبلوں کو شدید زخمی کردیا اور فرار ہوگئے۔ تفصیلات کے مطابق تھانہ گرین ٹاﺅن کے اہلکار کانسٹیبل عنصر، عمر دراز اور ریاست باگڑیاں پنڈ کے قریب موٹر سائیکلوں پر گشت کررہے تھے۔ انہوں نے ایک موٹر سائیکل پر سوار تین مشکوک افراد کو روکا تو انہوں نے پولیس اہلکاروں پر گولیاں برسا دیں اور زخمی اہلکاروں کا سرکاری اسلحہ بھی چھین کر فرار ہوگئے۔ زخمی اہلکاروں کو ہسپتال داخل کرا دیا گیا۔ اطلاع ملنے پر پولیس کی بھاری نفری موقع پر پہنچ گئی اور حملہ آوروں کی گرفتاری کیلئے علاقہ کی ناکہ بندی کرلی اور مختلف مقامات پر چھاپے مارے مگر انکا سراغ نہ مل سکا۔