نیشنل جونیئر ہاکی چیمپئن شپ ‘مزید سات میچوں کا فیصلہ

لاہور (نمائندہ سپورٹس) چھتیسویں نیشنل جونیئر ہاکی چیمپئن شپ کے تیسرے روز کھیلے جانے والے سات میچز میں آرمی بی، کے پی کے اے، سوئی سدرن گیس کمپنی، پنجاب ڈی، پنجاب بی، واپڈا اور آرمی اے کی ٹیموں نے اپنے اپنے میچز جیت لیے۔ نیشنل ہاکی سٹیڈیم میں جاری چیمپئن شپ میں ہفتہ کے روز پہلا میچ آرمی بی اور آزاد جموں کشمیر کی ٹیموں کے درمیان کھیلا گیا۔ اس میچ میں آرمی بی ٹیم نے چار صفر سے کامیابی اپنے نام کی۔ دوسرے میچ میں کے پی کے اے نے پنجاب سی کو پانچ ایک گول سے پچھاڑ دیا۔ تیسرا میچ سوئی سدرن گیس کمپنی اور کے پی کے بی ٹیموں کے درمیان کھیلا گیا جس میں سوئی گیس ٹیم نے صفر کے مقابلے میں چار گول سے کامیابی حاصل کی۔ چوتھے میچ میں پنجاب ڈی نے گلگت بلتستان کو سترہ صفر کے بڑے مارجن سے شکست دی۔ پانچویں میچ میں پنجاب بی نے بلوچستان کو تین صفر سے ہرا دیا۔ چھٹا میچ واپڈا اور کسٹمز کی ٹیموں کے درمیان دلچسپ رہا تاہم واپڈا نے چار صفر سے کامیابی اپنے نام کی۔ دن کے ساتویں اور آخری میچ میں آرمی اے نے سندھ کو پانچ صفر سے ہرا دیا۔ چیمپیئن شپ میں آج آرام کا دن ہوگا۔