سڈنی (پی پی آئی) امریکہ کی سرینا ولیمز نے آسٹریلین اوپن گرینڈ سلام ٹینس ٹورنامنٹ کے فائنل میں روس کی دینارا سافینا کو باآسانی شکست دے کر ٹائٹل اپنے نام کر لیا۔ اس کامیابی کے ساتھ سرینا ولیمز نئی عالمی رینکنگ میں پہلے نمبر پر آ گئیں۔ سرینا نے سافینا کو آئوٹ کلاس کرتے ہوئے 6-0 اور 6-3 کے دو سیٹس میں ہی شکست دیتے ہوئے اپنے کیریئر کا 10 واں گرینڈ سلام سنگلز تائٹل جیت لیا۔ دوسری سیڈ 27 سالہ سرینا نے اپنی حریف کو دو شانوں چت کرتے ہوئے پہلا سیٹ صرف 22 منٹ میں ہی اپنے نام کر لیا جبکہ دوسرے سیٹ میں روسی سٹار دبائو میں آ گئیں جبکہ سافینا کا یہ دوسرا گرینڈ سلام فائنل تھا۔ دوسرے سیٹ میں سافینا نے آغاز میں ہی بریک کر دیا تھا تاہم ولیمز نے اس طرح واپسی کی کہ سافینا کو سنبھلنے کا بھی موقع نہ ملا۔ دریں اثناء امریکہ کے برائن برادرز نے آسٹریلین اوپن ٹینس ٹورنامنٹ میں مینز ڈبل ایونٹ جیت کر ساتواں بڑا ٹائٹل اپنے نام کرلیا۔ باب اینڈ مائیک برائن نے بھارت کے مہیش بھوپتی اور مارک ناولز کو ہرا کر آسٹریلین اوپن ٹورنامنٹ کا مینز ڈبل ایونٹ جیت لیا۔