اسلام آباد (این این آئی) مسلم لیگ ن کے سینئر نائب صدر و سینیٹر ذوالفقارکھوسہ نے کہا ہے کہ الطاف حسین کھل کر بتائیں انہیں کس سے خطرہ ہے۔ پارلیمنٹ ہائوس کے باہر صحافیوں سے بات چیت کرتے ہوئے ذوالفقارکھوسہ نے کہاکہ عمران فاروق قتل کیس عالمی شہرت حاصل کر گیا ہے، برطانوی تحقیقاتی ادارے سکاٹ لینڈ یارڈ کی شہرت بھی بین الاقوامی ہے برطانوی تحقیقاتی ادارے کا ٹریک ریکارڈ ہے کہ وہ معاملہ کی تہہ تک پہنچتے ہیں۔ انہوں نے الطاف حسین کی پاکستان میں تقاریر کے حوالے سے تبصرہ کرتے ہوئے کہاکہ الطاف حسین برطانوی شہری ہیں اور ایک برطانوی شہری کو پاکستان میں بیانات نہیں دینے چاہئیں، انہوں نے کہاکہ الطاف حسین کھل کر بتائیں انہیں کس سے اورکیسا خطرہ ہے۔