لاہور (خصوصی رپورٹر) وزیر اعلیٰ پنجاب محمد شہباز شریف سے وزیر اعظم کے مشیر برائے خزانہ مفتاح اسماعیل نے ملاقات کی، اس دوران معیشت کی مضبوطی کیلئے اٹھائے گئے اقدامات اور چائنہ پاکستان اکنامک کوریڈور کے تحت جاری منصوبوں پر بات ہوئی۔ وزیراعلیٰ نے کہا کہ خود مختار اور خوشحال پاکستان کی منزل کا حصول ہمارا مشن ہے اور اس مشن کی تکمیل کیلئے ہر ممکن وسائل بروئے کار لائے جار ہے ہیں۔ انہوں نے کہاکہ حکومت کی ٹھوس معاشی پالیسیوں کے باعث معیشت میں نمایاں بہتری آئی معیشت کو مضبوط بنانے کے حوالے سے حکومت کے اقدامات بار آور ثابت ہوئے۔ ورثے میں ملنے والی بیمار معیشت کی بحالی مسلم لیگ (ن) کی حکومت کا عظیم کارنامہ ہے۔ موثر ترقیاتی حکمت عملی کے باعث معاشی و تجارتی سرگرمیوں کو فروغ ملاہے اور سرمایہ کاری بڑھنے سے روزگار کے لاکھوں نئے مواقع پیدا ہورہے ہیں۔ انہوں نے کہا کہ چائنہ پاکستان اکنامک کوریڈور پاکستان کی ترقی اور خوشحالی کاعظیم الشان منصوبہ ہے سی پیک کے تحت پاکستان میںبہت سے منصوبے مکمل ہوچکے۔ ہزاروں میگاواٹ بجلی نیشنل گرڈ میں شامل ہوئی دنیا پاکستان میں منصوبوں کی تیز رفتاری سے تکمیل پر حیران ہے۔ اقتصادی راہداری کا منصوبہ حقیقی معنوں میں گیم چینجر ثابت ہوا۔ سی پیک نے پاکستان میں غیرملکی سرمایہ کاری کے دروازے کھول دیئے ہیں اور ہم سی پیک کے عظیم الشان سرمایہ کاری پیکیج پر چین کے صدر، وزیراعظم اور چینی عوام کے شکرگزار ہیں۔ سی پیک کے تحت ہونیوالی سرمایہ کاری سے دونوں ممالک کے عوام کے باہمی روابط بھی بڑھے۔ سی پیک کے منصوبے ملک و قوم کی تقدیر بدل دیں گے۔ سی پیک ایک اٹل حقیقت بن چکا اور یہ منصوبہ خطے سے دہشت گردی و انتہاپسندی کے خاتمے اور غربت میں کمی لانے کے حوالے سے بھی اہم کردار ادا کریگا۔ اقتصادی راہداری سے اقتصادی و سماجی ترقی کا نیا دور شروع ہوگا، پاکستان تجارتی و معاشی سرگرمیوں کا محور بنے گا۔ سی پیک منصوبہ تاریخ کا دھارا موڑ دے گا ۔ عوام کی ترقی کے مخالفین نے سی پیک کے عظیم منصوبے کو روکنے کی کوشش کی - ذاتی ایجنڈے کی خاطر قومی مفادات کو نقصان پہنچانے والے ملک و قوم کے خیر خواہ نہیں- اس موقع پر وزیراعظم کے مشیر برائے خزانہ مفتاح اسماعیل نے کہا کہ وزیراعلیٰ پنجاب نے صوبے کی ترقی کیلئے بے مثال اقدامات کئے ہیں۔ انہوں نے کہا کہ شہبازشریف نے انتھک محنت اور مثالی اقدامات سے صوبے کو بدل کررکھ دیا ہے ۔