لاہور(سپورٹس رپورٹر) پیپسی پی سی بی انڈر 16 پٹینگولر ٹی ٹونٹی ٹورنامنٹ سندھ نے جیت لیا۔ قذافی سٹیڈیم میں ٹورنامنٹ کا فائنل میچ سندھ اور پنجاب کی ٹیموں کے درمیان کھیلا گیا جس میں سندھ انڈر 16 ٹیم نے پہلے بیٹنگ کرتے ہوئے مقررہ بیس اوورز میں چھ وکٹوں کے نقصان پر 182 رنز سکور کیے جس میں صائم ایوب نے 61 اور سلمان خان نے 54 رنز کی نمایاں اننگز کھیلی۔ پنجاب کی جانب سے باولنگ میں وہاب احمد اور عمر ایمان نے دو دو کھلاڑیوں کو آوٹ کیا۔ 183 رنز کے ہدف کے تعاقب میں پنجاب کی ٹیم مقررہ اوورز میں 9 وکٹوں پر 172 رنز بنا سکی۔ سمیر ثاقب نے ناقابل شکست 44 اورخلیل الرحمان 40 رنز بنا کر نمایاں رہے۔ سندھ کی جانب سے کاشف علی نے تین اور صائم ایوب نے دو کھلاڑیوں کو آوٹ کیا۔ سندھ ٹیم نے 10 رنز سے کامیابی حاصل کر کے ٹورنامنٹ کا ٹائٹل بھی اپنے نام کر لیا۔ ٹورنامنٹ کی اختتامی تقریب کے مہمان خصوصی ہارون رشید تھے جنہوں نے کھلاڑیوں میں انعامات تقسیم کیے۔ اس موقع پر باسط علی اور فرخ زمان بھی موجود تھے۔