کوہاٹ: کشتی حادثہ، پاک فوج کا ریسکیو آپریشن، 19 نعشیں برآمد، تعداد 52 

  کوہاٹ، تاندہ (آئی این پی+ نوائے وقت رپورٹ)  تاندہ ڈیم سے مزید19 افراد کی نعشوں کو نکال لیا گیا ہے۔ جھیل میں کشتی ڈوبنے سے جاں بحق  طلبہ، اساتذہ  کی تعداد 52 ہو گئی۔ نعشیں لواحقین کے حوالے کر دی گئی ہیں۔ تمام شہداء  کی اجتماعی نماز جنازہ بھی ادا کردی گئی ہے۔ دریں اثناء ترجمان آئی ایس پی آر نے کہا ہے کہ پاک فوج کا تاندہ ڈیم پر ریسکیو اور ریلیف آپریشن جاری ہے۔ پاک فوج کے دستوں کی ریسکیو، سول انتظامیہ سے ملکر 72 گھنٹے سے کوششیں جاری ہیں۔ مسلسل کام کرتے ہوئے 5 طلبہ کو ڈیم سے زندہ نکال لیا گیا۔ ریسکیو کئے گئے 5 طلبہ کو ڈسٹرکٹ ہسپتال کوہاٹ منتقل کر دیا گیا۔ پاک فوج کے انجینئرز، ایس ایس جی کے غوطہ خوروں نے 52 جاں بحق طلباء اور اساتذہ کی نعشیں نکال لیں، لاپتہ شخص کی تلاش جاری ہے۔