نادرا لاہور ریجن میں وراثتی و جانشینی سر ٹیفکیٹ کے اجراء کیلئے خصوصی مراکز

لاہور(کامرس رپورٹر) شہریوں کو وراثتی و جانشینی سر  ٹیفکیٹ کے اجراء کی باسہولت خدمات فراہم کرنے کیلئے نادرا لاہور ریجن میں 11 خصوصی مراکز کام کر رہے ہیں۔ ترجمان نادرا کے مطابق لاہور شہر میں 4 مراکز سمیت لاہور ریجن کے تمام ضلعی ہیڈکوارٹرز میں قائم نادرا مراکز سے مرد و خواتین شہری سوموار تا ہفتہ صبح 8:30 بجے سے 3:30بجے، اور جمعہ کو صبح 8:30بجے سے 12:30بجے کے دوران وراثتی سر  ٹیفکیٹ اور لیٹر آف ایڈمنسٹریشن سے متعلق تمام خدمات ایک چھت تلے حاصل کرسکتے ہیں۔ واضح رہے یہ نادرامراکزضلع لاہور میں خیابان جناح سیکٹر ڈی ایچ اے، نادرامیگا سنٹر داتاگنج بخش ساندہ روڈ، ایبٹ روڈ اور جوہر ٹاؤن لاہور سمیت شیخوپورہ،ننکانہ، نارووال، سیالکوٹ، گوجرانوالہ، اوکاڑہ، قصور اضلاع میں قائم کئے گئے ہیں۔ اس سلسلے میں شہری مزید معلومات اور رہنمائی کیلئے نادرا ہیلپ لائن نمبر (051-111-786-100) پر رابطہ کر سکتے ہیں۔