وزیراعظم عمران خان نے پاکستان تحریک انصاف اوراتحادی جماعتوں کے ارکانِ پارلیمنٹ سے کہاہے کہ وہ سال دوہزاربیس کے دوران قانون سازی کے ذریعے مفادِ عامہ کے مسائل اجاگر کرنے اوران کے حل پرپوری توجہ دیں۔وہ تحریک انصاف اور اس کی اتحادی جماعتوں کے سینیٹروں سے گفتگو کررہے تھے جنہوں نے اسلام آباد میں ان سے ملاقات کی ۔وزیراعظم نے کہاکہ بدعنوانی کے ناسورنے ملکی معیشت کوتباہ کردیا ہے اوراس کاخاتمہ تحریک انصاف کی حکومت کے منشور کابنیادی جزو ہے۔انہوں نے بدعنوان عناصر کوانصاف کے کٹہرے میں لانے کے لئے ان کے خلاف کوششیں جاری رکھنے کے عزم کااعادہ کیاہے۔ملاقات کے دوران ملک کی مجموعی صورتحال ،حکومت کی سرپرستی میں ہونے والی اصلاحات ، عوامی مسائل کے حل کے لئے متعلقہ قانون سازی اور حکومتی کامیابیوں کے ثمرات عوام کو منتقل کرنے کے لئے حکمت عملی کا بغور جائزہ لیاگیا۔وزیراعظم نے دوہزاربیس کو عوام کے لئے ریلیف کاسال قراردیتے ہوئے کہاکہ اس سال حکومت معاشی نظام کے استحکام کے لئے کوشاں رہے گی تاکہ اس کے ثمرات عام آدمی کو پہنچاکر اس کی زندگی میں بہتری لائی جاسکے۔