حافظ آباد(نمائندہ نوائے وقت+نمائندہ خصوصی) حافظ آبادکے حلقہ این اے 67سے سابق ایم این اے شوکت علی بھٹی سمیت پی ٹی آئی کے 3امیدواروں کے کاغذات نامزدگی مسترد کردئے گئے ۔کاغذات نامزدگی مسترد کئے جانے والوں میں شوکت علی بھٹی کی بہن انیقہ مہدی حسن اور پی ٹی آئی کے ضلعی صدر عمران عباس بھٹی بھی شامل ہیں جبکہ حلقہ این اے 67 سے 26امیدواروں کا کاغذات نامزدگی منظور کرلئے گئے ۔ان میں سابق وفاقی وزیر صحت اور ن لیگ کی سائرہ افضل تارڑ پیپلز پارٹی کے سید وسیم الحسن نقوی ، محمد یسن سندھو، تحریک لبیک کے پیر ظہیر الحسن بھی شامل ہیں ۔ دوسری جانب صوبائی اسمبلی کے حلقہ پی پی سے پی ٹی آئی کے امیدوار سکندر نواز بھٹی کے بھی کاغذات نامزدگی مسترد کر دیئے گئے  ہیںجبکہ مذکورہ حلقہ سے ن لیگ کے شیخ گلزار احمد، پیپلز پارٹی کے سید وسیم الحسن نقوی، محمد یسن سندھو، تحریک لبیک کے عثمان خضر ، ملک گل نواز پھول، ملک فیاض احمد اعوان کے بھی کاغذات نامزدگی منظور کرلئے گئے۔