قومی کرکٹرز کی مشقیں جاری‘ مکی آرتھر دورہ انگلینڈ کے بعد ہیرو بن سکتے ہیں: جولیان فانٹین

لندن(سپورٹس ڈیسک) پاکستان کرکٹ ٹیم نے انگلینڈ کیخلاف ٹیسٹ سیریز سے قبل سائوتھمپٹن کے بعدٹائوٹن میں ٹریننگ کا آغازکر دیا،نئے فیلڈنگ کوچ سٹیورکسن نے مشقیں کروائیں۔ گرین شرٹس اتوار کو سمرسیٹ کیخلاف3روزہ پریکٹس میچ سے دورہ انگلینڈ کا باقاعدہ آغاز کرے گی۔پاکستان کرکٹ ٹیم کے سابق فیلڈنگ کوچ جولیان فانٹین کا کہنا ہے کہ نئے ہیڈ کوچ مکی آرتھر دورہ انگلینڈ میں کامیابی حاصل کرکے ہیرو بن سکتے ہیں۔ مکی آرتھر انگلینڈ کے دورے میں ناکامی کی صورت میں جملوں کے نشتر کا سامنا کرنا ہوگا۔ دورہ انگلینڈ ان کا پہلا امتحان ہے۔ حقیقی دنیا میں ہر کوئی سمجھ جائے گا کہ مکی آرتھر چند مہینوں میں دنیا کو تبدیل نہیں کرسکتے تاہم کرکٹ میڈیا کا ایک مخصوص حلقہ بہت جلد انھیں قربانی کا بکرا بنا سکتا ہے، ابتدائی طور پر ایک سیاسی گروہ اپنے ایجنڈے کو آگے بڑھانے کی خاطر کمزور کام کرنے والے گروپ کو نیچا دکھانے کی کوشش کرے گا۔