میپکو سے کرپشن اور اوورریڈنگ کا خاتمہ نہ ہوسکا

ملتان (جنرل رپورٹر) بلند و بانگ دعوؤں کے باوجود میپکو سے کرپشن اور اوور ریڈنگ کا خاتمہ ممکن نہ ہوسکا، محکمے میں موجود کرپٹ عناصر نے شہریوں کی زندگی اجیرن کررکھی ہے ۔ تفصیلات کے مطابق میپکو غلہ منڈی سب ڈویژن کے علاقے لوہا ر کالونی ملتان کے رہائشی محمد اقبال خان نے اپنی دکان پر بجلی کا میٹر لگوانے کے لئے اپریل 2016 ء میں ڈیمانڈ نوٹس اداکیا، مگر میپکو کا سجاد نامی اہلکار جس کا موبائل فون نمبر03017456140 ہے میٹر لگانے کے عوض بھاری رشوت کا مطالبہ کرتا رہا ، رشوت نہ دینے پر تا حال کنزیومر کو کنکشن فراہم نہ کیا ہے۔ جبکہ گزشتہ روز بجلی میٹر کی تنصیب سے قبل ہی بل بجلی موصول ہوگیا ہے ۔ جس میں کنکشن جاری کرنے کی تاریخ 30 مئی 2016 درج ہے ۔ دلچسپ بات یہ ہے کہ بل میں کنزیومر کو 50 یونٹ کی اوور ریڈنگ بھی ڈال دی گئی ہے اور اس طرح 1439 روپے کا بل بجلی بنادیا گیا ہے ۔ اس صورتحال سے میپکو کی کارکردگی اور جدید ڈیجیٹل میٹر ریڈنگ کے دعوے کی قلعی کھلتی ہے ۔ میپکو کے افسران عوام کو سہولیات بہم پہنچانے کے دعوے تو کرتے ہیں مگر صورتحال اس کے برعکس ہے ۔ میپکو میں کرپشن کا راج ہے ، اور اوور ریڈنگ خاتمہ ممکن نہ ہوسکا ہے ، جبکہ رشوت کے بغیر نئے کنکشن کا حصول ممکن نہیں ۔ کنزیومر محمد اقبال خان حوالہ نمبر12151251025802 نے اس صورتحال میں سیشن کورٹ ملتان سے رجوع کرنے اور دعویٰ ہرجانہ دائر کیا ہے۔