قومی سلامتی کمیٹی کا ان کیمرہ اجلاس آج: بھارت‘ افغانستان‘ کشمیر پر بریفنگ دی جائیگی 

اسلام آباد (نامہ نگار) پارلیمانی کمیٹی برائے قومی سلامتی کا ان کیمرہ اجلاس آج پارلیمنٹ ہاؤس میں ہو گا۔ افغانستان، بھارت اور انڈیا کے غیر قانونی زیر تسلط کشمیر سمیت ملکی داخلی صورتحال پر بھی بریفنگ دی جائے گی۔ ڈی جی آئی ایس آئی پارلیمانی کمیٹی کو بریفنگ دیں گے۔ اجلاس میں پارلیمانی جماعتوں کے نمائندے بھی شرکت کریں گے۔اجلاس میں چیف آف آرمی سٹاف جنرل قمر جاوید باجوہ، ڈی جی آئی ایس آئی جنرل فیض حمید اور سروسز چیف پارلیمانی نمائندوں کو خطے کی مجموعی صورتحال سمیت افغانستان کی موجودہ صورتحال سے آگاہ کریں گے۔ آج کے اجلاس میں شہباز شریف، بلاول بھٹو زرداری، اے این پی کے امیر حیدر ہوتی، ایم ایم اے کے مولانا اسعد محمود، وزیر داخلہ شیخ رشید احمد، وزیر خارجہ شاہ محمود قریشی، مسلم لیگ (ق) کے طارق بشیر چیمہ و دیگر شرکت کرینگے۔