لاہور (کلچرل رپورٹر) پاکستان کے معروف فلم رائٹر، فلم ڈائریکٹر، فلمساز اور ہفت روزہ فیملی میگزین کے ایڈیٹر علی سفیان آفاقی کی 62 سالہ فلمی و صحافتی خدمات کے اعتراف میں پاکستان فلم اینڈ ٹی وی جرنلسٹس ایسوسی ایشن نے گذشتہ روز الحمرا کلچرل کمپلیکس میں ایک تقریب کا اہتمام کیا جس میں اداکار مصطفےٰ قریشی، سیدنور، نشو، اصغر ندیم سید، حبیب اور پرویز کلیم نے ان کی شخصیت اور ان کی فلمی اور صحافتی خدمات پر روشنی ڈالی۔ تقریب کی کمپیئرنگ مصطفےٰ قریشی نے کی۔ تقریب کے دیگر شرکاءمیں زریں پنا، جرار رضوی، دلجیت مرزا، شیبا بٹ، جاوید اطہر صوفی، وسیع قریشی، ذیشان صدیقی اور پرویز مظہر شامل تھے۔ مقررین نے کہا کہ علی سفیان آفاقی نے اچھی فلمیں لکھیں اور بنائیں۔ وہ بہت بڑے رائٹر اور ڈائریکٹر ہیں۔ انہوں نے فلم انڈسٹری کے بعد صحافت میں بھی معیاری کام کیا۔ ان کی خدمات قابل تحسین ہیں۔