دنیا میں ساڑھے چار کروڑ افراد غلامی میں جکڑے ہیں‘ بھارت پونے دو کروڑ غلاموں کیساتھ سرفہرست‘ پاکستان کا تیسرا نمبر

سڈنی (این این آئی)آسٹریلیا میں حقوق انسانی کے تحفظ کے لئے سرگرم تنظیم کے سروے کے مطابق دنیا میں اس وقت بھی ساڑھے چار کروڑ لوگ جدید دور کے غلام کی حیثیت سے کام کر رہے ہیں۔ سڈنی میں قائم ’’واک فری فاونڈیشن‘‘ کے 2016 کیلئے غلاموں سے متعلق عالمی انڈیکس کے مطابق یہ وہ غلام ہیں جن سے اس جدید دور میں بھی جبری طور پر فیکٹریوں، فارمز اور کانوں میں جبری مشقت کروائی جاتی ہے یا پھر انھیں جنسی مقاصد کے لیے زبردستی استعمال کیا جاتا ہے، ان میں مردوں کے علاوہ خواتین اور بچے بھی شامل ہیں۔ رپورٹ میں کہا گیا کہ اس قسم کی غلامی میں پھنسے سب سے زیادہ افراد ایشیا میں ہیں اور اس سے متعلقہ فہرست کے پہلے پانچ ممالک اسی خطے سے ہیں۔ رپورٹ کے مطابق بھارت دنیا میں غلامی میں جکڑے ایک کروڑ 80 لاکھ افراد کی وجہ سے پہلے نمبر ہے۔ دوسرے نمبر پر چین ہے جہاں 30 لاکھ سے زیادہ افراد اس قسم کی جبری مشقت کر رہے ہیں ٗ پاکستان 20 لاکھ سے زائد ایسے ’غلاموں‘ کے ساتھ تیسرے نمبر پر ہے۔اس کے علاوہ بنگلہ دیش بھی پہلے دس ممالک میں شامل ہے۔یہ تنظیم ایک آسٹریلوی ارب پتی اور مخیر شخصیت اینڈریو فارسٹ نے 2012 میں اس مسئلے کی جانب توجہ دلانے کے لیے قائم کی تھی۔ تازہ سروے کے لیے اس تنظیم نے 167 ممالک میں 53 زبانوں میں 42 ہزار انٹرویوز کی بنیاد پر رپورٹ تیار کی۔ رپورٹ کے مطابق دو سال قبل کے اندازوں کے مقابلے میں ایسے افراد کی تعداد میں 28 فیصد اضافہ ہوا۔ رپورٹ میں جدید غلامی کی تشریح کچھ اس طرح سے کی گئی کہ ایک شخص دھونس یا دھمکیوں، تشدد، طاقت کے غلط استعمال یا دھوکے کی وجہ سے کام نہیں چھوڑ سکے اور قرض دار ہونے کی وجہ سے اسے ذاتی ملازم بنا کر رکھا جائے۔ انہوںنے کہاکہ ہم دنیا کی دس بڑی معیشتوں سے مطالبہ کرتے ہیں کہ وہ ایسے قوانین متعارف کروائیں جو کم از کم برطانوی ماڈرن سلیوری ایکٹ 2015 جیسا سخت ہو تاکہ اداروں کو اپنے سپلائی چین میں غلامی کیلئے جواب دہ بنایا جا سکے۔
غلام