کراچی : جیل چورنگی کے قریب سُپر اسٹور کے بیسمنٹ میں آگ لگ گئی

کراچی: کراچی کے علاقے جیل چورنگی پر واقع سُپر اسٹور کے بیسمنٹ میں آگ لگ گئی۔
تفصیلات کے مطابق کراچی کے علاقے جیل چورنگی پر رہائشی عمارت کے اندر موجود سُپر اسٹور کے بیسمنٹ میں آگ لگ گئی، آگ عمارت کے بیسمنٹ میں کپڑوں میں لگی جو دیکھتے ہی دیکھتے پھیل گئی تاہم آگ لگنے کی وجوہات کا تاحال علم نہیں ہو سکا ہے۔فائر بریگیڈ حکام کا کہنا ہے کہ دو فائر ٹینڈر بیسمنٹ میں لگی آگ کو بھجانے کی کوشش کررہے ہیں، اُن کے مطابق اگرچہ بیسمنٹ میں لگی آگ پر قابو پانا مشکل ہوتا ہے لیکن ہم اس آگ پر فوری قابو پانے کی پوری کوشش کرینگے۔فائر بریگیڈ حکام نے آگ کی شدت کو مدنظر رکھتے ہوئے اسے تیسرے درجے کی آگ قرار دے دیا ہے اور شہر بھر سے فائربریگیڈ کی گاڑیوں کو موقع پر طلب کرلیا گیا ہے، دھواں زیادہ ہونے کے باعث فائر فائٹرز کو مشکلات کاسامنا ہے۔ذرائع کے مطابق عمارت کے اندر موجود تمام لوگوں کو نکال لیا گیا ہے جبکہ پولیس بھی عمارت کے قریب پہنچ گئی ہے۔ پولیس کے مطابق سُپر اسٹور کا عملہ اور خریدار محفوظ ہیں، اسٹور میں کسی شخص کی موجودگی کی اطلاع نہیں ہے۔