اسلام آباد (خبر نگار) سینیٹ کی قائمہ کمیٹی قانون و انصاف نے زینب کے قاتل کی لاش کو کنکرمارنے کی تجویز مسترد کردی ہے اور کہا ہے کہ کسی لاش شہر میں اس طرح نہیں گھما سکتے، جیسے زندہ انسان کا احترام ہے اتنا ہی کسی کی لاش کا احترام ہے اور اسلام میں لاش کا زیادہ احترام ہے لہذا کسی لاش کی اس طرح سے بے حرمتی نہیں کی جا سکتی۔بدھ کو سینیٹ کی قائمہ کمیٹی برائے قانون و انصاف کا سینیٹر جاوید عباسی کی صدارت میں اجلاس ہوا ۔لاش کو کنکریاں مارنے کی وزارت قانون کی تجویز مسترد کرتے ہوے ٔ زینب کے قاتل کو سرعام پھانسی دینے کے معاملے پر بھی غور کیا گیا، اجلاس میں وزارت قانون نے زینب قتل کے ملزم کو سرعام پھانسی دینے کی مخالفت کرتے ہوئے کہا کہ سرعام پھانسی دینے پر اعتراضات سامنے آ رہے ہیں۔وزارت قانون نے تجویز دیتے ہوئے کہا کہ ملزم کو جیل میں پھانسی دیکر اس کی لاش شہر میں گھمائی جائے، لاش شہر میں گھمانے سے لوگوں کو پتہ چلے گا اور خوف بھی پیدا ہوگا جب کہ لاش کو لوگ کنکریاں بھی مار سکتے ہیں جیسے شیطان کو ماری جاتی ہیں۔کمیٹی نے وزارت قانون کی تجویز مسترد کرتے ہوئے کہا کہ کسی کی لاش شہر میں اس طرح نہیں گھما سکتے، جیسے زندہ انسان کا احترام ہے اتنا ہی کسی کی لاش کا احترام ہے اور اسلام میں لاش کا زیادہ احترام ہے لہذا کسی لاش کی اس طرح سے بے حرمتی نہیں کی جا سکتی۔کمیٹی کا مختصراجلاس کو ئی ایک گھنٹہ جاری رہا۔