کراچی(آئی این پی) شہر قائد میں فائرنگ کے مختلف واقعات میں پاکستان تحریک انصاف (پی ٹی آئی) کے کارکن سمیت 3 افراد زخمی ہوگئے۔پولیس کے مطابق سچل کے علاقے میں نامعلوم نقاب پوش ملزم نے پی ٹی آئی سندھ یوتھ کے جنرل سیکرٹری علی میر جت پر گھر کے قریب فائرنگ کردی۔ علی میر جت کو 2 گولیاں لگیں۔پی ٹی آئی کے رہنما حلیم عادل شیخ، خرم شیر زمان اور علی زیدی نے ہسپتال پہنچ کر زخمی کارکن کی عیادت کی۔ اس موقع پر حلیم عادل شیخ نے کہا کہ ملزم کو گرفتار نہ کیا گیا تو احتجاج کریں گے۔دوسری جانب لیاقت آباد نمبر 6 میں ڈکیتی کے دوران مزاحمت پر ایک شخص زخمی ہوگیا جبکہ پولیس نے فائرنگ کرنے والے شخص کو گرفتار کرلیا۔صفورہ کے علاقے میں بھی فائرنگ کے نتیجے میں ایک شخص زخمی ہوا۔