اسلام آباد(نیوزرپورٹر) قومی ہیرو پاکستانی کوہ پیما محمد علی سدپارہ کو خراج عقیدت پیش کرنے کیلئے اسلام آباد میں کرکٹ میچ کا انعقاد کیا گیا۔کھلاڑیوں سمیت مہمانوں نے محمد علی سدپارہ کی ملک کیلئے تاریخی خدمات کے مدنظر رکھتے ہوئے نشان پاکستان دینے کا مطالبہ کیا۔ چک شہزاد میں سکردو انچن اور جی بی سی سی کرکٹ ٹیموں کے درمیان کرکٹ میچ کے انعقاد سے قبل ایک منٹ کی خاموشی اختیار کی گئی، اس موقع پر بلتستان کرکٹ ایسوسی ایشن کے صدر بشارت ظہیر، اور الپائن کلب پاکستان کے نائب صدر ایاز شگری نے قومی ہیرو کو خراج تحسین کرتے ہوئے کہا کہ محمد علی سدپارہ نے دنیا کی 8 بلند چوٹیوں پر سبز ہلالی پرچم لہرایا اور اپنی زندگی کا اختتام دنیا کی دوسری بلند ترین چوٹی کے ٹو پر پاکستانی پرچم لہرا کر کیا۔ قومی ہیرو نے کے ٹو پر اپنی جان کا نذرانہ دے کر دنیا میں پاکستان کا سر فخر سے بلند کیا، محمد علی سدپارہ جیسے قومی ہیرو صدیوں بعد پیدا ہوتے ہیں۔