پریذیڈنٹ آف پاکستان پولو کپ‘ ڈائمنڈ پینٹس ‘ ایف جی پولوسیمی فا ئنل میں پہنچ گئیں 

 لاہور (سپورٹس رپورٹر) جناح پولو فیلڈز کے زیراہتمام دوسرے پریذیڈنٹ آف پاکستان پولو کپ دو اہم میچز کھیلے گئے جس کے بعد پول بی سے ڈائمنڈ پینٹس اور ایف جی پولو نے سیمی فائنلز کیلئے کوالیفائی کرلیا۔ میچز دیکھنے کیلئے فیملیز اور پولو لورز کی بڑی تعداد موجود تھی۔ پہلے میچ میں ڈائمنڈ پینٹس کی ٹیم نے ڈی ایس پولو کی ٹیم کو 8-4 سے ہرا کر سیمی فائنل کیلئے کوالیفائی کیا۔ ڈائمنڈ پینٹس کی طرف سے چولو کورٹی نے پانچ  جبکہ احمد علی ٹوانہ نے دو اور نکو رابٹس نے ایک گول کیا۔ دوسرے میچ میں ایف جی پولو ٹیم نے ماسٹر پینٹس کی ٹیم کو 5-3.5 سے ہرا دیا۔ ایف جی پولو کی طرف سے راول لیپ لا سیٹ نے تین اور میاں عباس مختار نے دو گول کیے۔ پہلا سیمی فائنل جمعتہ المبارک کو بی این پولو اور ڈائمنڈ پینٹس کے درمیان جبکہ دوسرا سیمی فائنل ایف جی پولو اور ماسٹر پینٹس /نیوایج کیبلز کے درمیان کھیلا جائیگا۔ جمعرات کو ہارنے والی چاروں ٹیمیں آپس میں سب سڈری فائنل کیلئے کوالیفائنگ کے میچز کھیلیں گی۔