کراچی (اسٹاف رپورٹر) دارارقم اسکولز کراچی ریجن کے ڈپٹی ڈائریکٹر اور فیڈریشن آف پرائیویٹ اسکولز کے وائس چیئرمین سید خالد رضا کی المناک شہادت پر ڈائریکٹر نجی اسکولز تنظیم اساتذہ سندھ شاکر شکور، جوائنٹ سیکریٹری تنظیم اساتذہ سندھ عبدالمجید عارف، سیکریٹری نشرواشاعت سندھ مشرف کریم، ڈائریکٹر حرانیشنل ایجوکیشن فاونڈیشن سندھ پروفیسر محمد حسین سومرو، ڈپٹی ڈائریکٹر سید مجاھدالسلام، ریجنل ڈائریکٹر پروفیسر قاضی غوث و دیگر نے اپنے علحیدہ علحیدہ بیانات میں سید خالد رضا کے المناک شہادت پر دلی دکھ اور افسوس کا اظہار کیا ہے۔ انہوں نے وزیر اعلی سندھ، ڈی جی رینجرز، آئی جی سندھ اور دیگر قانون نافذ کرنے والے اداروں سے واقعے میں ملوث افراد کو گرفتار کرکے سخت سے سخت سزا دینے اور مرحوم کے اہل خانہ کو انصاف فراہم کرنے کا مطالبہ کیا۔ تنظیم اساتذہ کے رہنماوں نے مزید کہا کہ اب شہر کراچی میں کوئی بھی شخص محفوظ نہیں حتی کہ ڈاکووں اور دہشت گردوں سے اساتذہ بھی محفوظ نہیں رہے۔ تنظیم اساتذہ پاکستان سندھ کے رہنماوں و دیگر نے مرحوم سید خالد رضا کی مغفرت، درجات کی بلندی کی دعا کرتے ہوئے کہا کہ تنظیم اساتذہ دکھ کی اس گھڑی میں مرحوم سید خالد رضا کے اہل خانہ کے ساتھ ہے۔