فیروزوالا: گھر میں آتشزدگی سے دوشیزہ ہلاک، 3 افراد زخمی 

لاہور؍ فیروز والہ؍ شیخوپورہ (نمائندہ خصوصی+ نامہ نگار) لاہور روڈ کی آبادی اقبال ٹاؤن ٹول پلازہ کے قریب ایک گھر میں شارٹ سرکٹ کے باعث آگ لگ گئی جس سے جھلس کر ایک 24سالہ لڑکی ربیا دختر صادق جاں بحق جبکہ دو خواتین سمیت تین افراد زخمی ہو گئے، زخمیوں میں 40سالہ غلام فاطمہ،26سالہ عمران صادق اور26سالہ ثمینہ عمران شامل ہیں۔ اطلاع ملنے پر ریسکیو1122کی ٹیم نے موقع پرجاکر آگ پر قابو پا لیا۔دریں اثناء مسلم ٹاؤن  محکمہ پولیس کی ایم ٹی ورکشاپ میں آگ بھڑک اٹھی۔ ریسکیو ٹیم نے ساڑھے تین گھنٹے کی کوشش کے بعد آگ پر قابو پا لیا ہے۔ آگ پولیس گاڑیوں کے ناکارہ ٹائروں کے گودام میں بھڑکی۔ آگ کے قریب ہی آئی جی پنجاب کے کیول کیڈ کی گاڑیاں موجود تھیں، جنہیں فی الفور محفوظ مقام پر پہنچا دیا گیا۔ آگ پر قابو پانے کے بعد کولنگ کا عمل مکمل کیا گیا۔ آتشزدگی کے باعث کوئی جانی نقصان نہیں ہوا۔ ایس ایس پی ایم ٹی ندا عمر چٹھہ نے بتایا کہ آگ ناکارہ ٹائروں کے گودام میں شارٹ سرکٹ کے باعث لگی، آگ لگنے کے متعلق دیگر پہلوؤں کا بھی جائزہ لیکر حتمی وجوہات کا تعین کیا جائے گا۔