بگٹی قتل کیس، عدالت نے مشرف کو شامل تفتیش کرنیکی اجازت دیدی

راولپنڈی (ثناءنیوز) انسداد دہشتگردی کی عدالت نے کوئٹہ پولیس کو نواب اکبر بگٹی قتل کیس میں سابق صدر پرویز مشرف کو شامل تفتیش کرنے کی اجازت دے دی۔ جج حبیب الرحمن کی عدالت میں کیس کی سماعت ہوئی، دوران سماعت کوئٹہ پولیس نے سابق صدر کے بے نظیر قتل کیس میں جسمانی ریمانڈ کی مدت ختم ہونے پر عدالت سے استدعا کی کہ اکبر بگٹی کیس میں سابق صدر سے تفتیش کرنے کے لئے جوڈیشل ریمانڈ دیا جائے جس پر عدالت نے سابق صدر کے فوری جسمانی ریمانڈ دینے کی استدعا کو مسترد کرتے ہوئے مشرف کو کیس میں شامل تفتیش کرنے کی اجازت دے دی، ڈی ایس پی کوئٹہ ندیم کی قیادت میں تفتیشی ٹیم سب جیل چک شہزاد میں سابق صدر کو شامل تفتیش کرکے بیان ریکارڈ کرے گی جس کے بعد بیان کی روشنی میں جسمانی ریمانڈ دینے یا نہ دینے کا فیصلہ ہوگا۔