کراچی(اسپورٹس رپورٹر)فائف اے سائیڈ رمضان فیسٹول ہاکی کپ بین الاقوامی کھلاڑیوں سے سجی انٹرنیشنل الیون نے اسپورٹس جرنلسٹس پر مشتمل سجاس الیون کو شکست سات کے مقابلے میں 9 گول سے جیت لی، اسپورٹس جرنلسٹس ایسوسی ایشن سندھ (سجاس) کے زیر اہتمام کے ایچ اے اسپورٹس کمپلیکس گلشن اقبال میں برقی قمقموں کی روشنی میں کھیلے جانے والے میچ میں فاتح ٹیم کے انٹر نیشنل ہاکی پلیئر اور کپتان تسنیم عثمانی نے چار گول اسکور کئے، سجاس الیون کی جانب سے مقصود احمد پانچ بار گیند کو جال کی راہ دیکھانے میں کامیاب رہے، سجاس کے فارورڈ انٹرنیشنل ہاکی کمنٹیٹر ریاض الدین نے دو گول کئے، پہلے ہاف کے اختتام پر سجاس کو 3-4 کی برتری حاصل تھی تاہم دوسرے ہاف میں تجربہ کار کھلاڑیوں پر مشتمل انٹرنیشنل الیون نے 7-9 سے میدان مار لیا، مقصود احمد میچ کے بہترین کھلاڑی قرار پائے۔میچ کے اختتام پر قومی ہاکی ٹیم کے سابق کپتان اولمپیئن حنیف خان نے سندھ اولمپک ایسوسی ایشن کے سینئر نائب صدر محفوظ الحق اور پی ایچ ایف کے کوآرڈینیٹر و سیکریٹری کے ایچ اے، سجاس کے صدر آصف خان ، سیکریٹری شاہد عثمان ساٹی اور رکن مجلس عاملہ زبیر نذیر خان کے ہمرہ کھلاڑیوں میں انعامات تقسیم کئے۔