لاہور (نامہ نگار) بادامی باغ میں سابق شوہر نے بیٹے اور 4 ساتھیوں کے ساتھ مل کر سابقہ بیوی اور اس کے نئے شوہر کو تیز دھار آلے سے گلے کاٹ کر قتل کر دیا۔ بادامی باغ کے علاقے میں ملزم ذاکر نے اپنے بیٹے یاسر اور دیگر چار ساتھیوں کی مدد سے سابقہ بیوی تیس سالہ یاسمین اور اس کے شوہر عمران کو گھر میں گھس کر کو تیز دھار آلے سے گلے کاٹ کر قتل کر دیا اور گھر سے چار بچیوں رباب، فضا بتول، منیبہ اور ماہم نور کو اغوا کرکے فرار ہو گئے۔ اطلاع پر پولیس نے چیکنگ کے دوران ایک کیری ڈبے سے اسلحہ برآمد کر کے ملزم علی رضا اور کیری ڈبہ کے ڈرائیور عامر کو گرفتار کیا۔ دوران تفتیش ملزمان نے دوہرے قتل کی اس واردات کا انکشاف کیا۔ ملزمان کی نشاندہی پر کوٹ عبدالمالک سے دیگر چار ملزمان ذاکر، یاسر، علی اور جاوید کوگرفتار کر کے چاروں بچیوں کو بازیاب کرا لیا ہے۔ ملزم ذاکرنے پولیس کو بتایا کہ مقتول عمران نے اس کی بیوی یاسمین عرف ثمینہ کو اپنی محبت کے جال میں پھنسا کر مجھ سے طلاق دلوا کر دوسری شادی کر رکھی تھی۔ منصوبہ بندی کے مطابق مقتولہ کا پہلے شوہر سے بیٹا یاسر ماں سے ملنے اس کے گھر گیا۔ جس نے رات گئے اندر سے گھر کا دروازہ کھولا، ہم نے دونوں میاں بیوی کو چھری اور ٹوکے کے وار کر کے قتل کر دیا۔