لاہور (خصوصی نامہ نگار) سنی اتحاد کونسل کے چیئرمین صاحبزادہ حامد رضا نے کہا ہے کہ ذوالفقار کھوسہ نے مسلم لیگ ن کے بت کدے میں اذان دی ہے۔ ن لیگ میں اختلافات کی چنگاری شعلہ بننے والی ہے۔ محرم کے بعد سیاسی زلزلے آئیں گے اور سب کچھ بدل جائے گا۔ تھر کے غریبوں کی بے بسی اور حکومتی بے حسی کی انتہا ہو گئی ہے۔ بلاول کے جلسوں پر خرچ ہونے والے اربوں روپے تھر میں خرچ کیے جاتے تو آج وہاں اموات نہ ہوتیں۔ قومی اداروں کی نجکاری کی مزاحمت کرینگے۔ بھکر کے ضمنی الیکشن میں سرپرائز دیں گے۔ حکمرانوں کے خلاف عوامی نفرت کا لاوا پھٹنے والا ہے۔ موجودہ حکومت جتنی دیر رہے گی مسائل میں اضافہ ہو گا۔ ان خیالات کا اظہار انہوں نے اپنے بیان میں کیا ہے۔  حکومت مہنگائی کنٹرول کرنے میں ناکام ہو چکی ہے۔ سردار ذوالفقار کھوسہ نے شریف برادران کے چہرے بے نقاب کر دیئے ہیں۔