یونس خان کے ٹیسٹ کرکٹ میں 8 ہزار رنز مکمل، زیادہ ڈبل سنچریاں بنانیوالے دوسرے پاکستانی بن گئے

ابوظہبی(سپورٹس ڈیسک )یونس خان نے آسٹریلیا کیخلاف ڈبل سنچری بنا کر ، ٹیسٹ کیرئیر کے آٹھ ہزاررنز مکمل کرلئے، سب سے زیادہ ڈبل سنچریاں بنانے والے دوسرے پاکستانی بن گئے۔محمد یوسف اور ظہیرعباس کو پیچھے چھوڑ دیا۔ یونس خان،ابوظہبی ٹیسٹ میں پوری آسٹریلوی ٹیم مل کر اکیلے یونس خان کو قابو نہ کرسکی، سینئربیٹسمین نے دوسرے روز بھی کینگروز بالرز کو نہیں بخشا۔یونس خان نے کیرئیر کے تیرانوے ٹیسٹ میں آٹھ ہزاررنز مکمل کئے۔ وہ پاکستان کی جانب سے آٹھ ہزاررنز بنانیوالے تیسرے پاکستانی بن گئے۔ٹیسٹ کرکٹ میں انضمام الحق اورمیانداد آٹھ ہزاررنز بناچکے ہیں۔ سینئربیٹسمین نے ٹیسٹ کیرئیر کی پانچویں اور آسٹریلیا کیخلاف پہلی ڈبل سنچری بھی جڑدی۔یونس خان نے ڈبل سنچریاںسکور کرنے میں محمد یوسف اور ظہیرعباس کو پیچھے چھوڑ دیا۔ وہ قومی کھلاڑیوں کی فہرست میں زیادہ ڈبل سنچریاں بنانے والے دوسرے بلے باز بن گئے۔ جاوید میانداد چھ ڈبل سنچریاں سکورکرکے سرفہرست ہیں۔