نیوزی لینڈ کیخلاف قومی ٹیسٹ سکواڈ کا اعلان ‘ شرجیل خان کی پہلی بار شمولیت

لاہور(نمائندہ سپورٹس)شرجیل خان کو ٹیم میں واپس لیا گیا ہے پاکستان کرکٹ بورڈ کی سلیکشن کمیٹی نے نیوزی لینڈ کے دورے میں کھیلے جانے والے دو ٹیسٹ میچوں کے لیے سولہ رکنی پاکستانی کرکٹ ٹیم کا اعلان کردیا ہے۔اوپنر شرجیل خان بیس ون ڈے اور پندرہ ٹی ٹوئنٹی کھیلنے کے بعد پہلی بار ٹیسٹ ٹیم میں شامل کرلیے گئے ہیں۔شرجیل خان کو سلیکٹرز نے محمد حفیظ پر ترجیح دی ہے جو ان دنوں فارم میں نہ ہونے کے سبب ٹیم میں جگہ بنانے میں کامیاب نہیں ہوسکے ہیں۔محمد حفیظ کو ویسٹ انڈیز کیخلاف شارجہ کے سہ روزہ میچ میں موقع دیا گیا تھا جس میں وہ دونوں اننگز میں صفر اور نو رنز ہی بناسکے تھے۔محمد حفیظ نے گزشتہ دنوں لاہور میں اپنے بولنگ ایکشن کا بایومکینک ٹیسٹ بھی کرایا تھا جس میں پتہ چلا کہ ان کا بولنگ ایکشن اب بھی آئی سی سی کے قواعد وضوابط کے مطابق نہیں ہے تاہم ابھی تک ان کے بولنگ ایکشن کا باضابطہ بایومکینک ٹیسٹ ممکن نہیں ہوسکا ہے۔اوپنر شان مسعود بھی انگلینڈ کے دورے کے بعد سے سلیکٹرز کا اعتماد حاصل کرنے میں کامیاب نہیں ہوسکے ہیں۔انگلینڈ کے دورے میں محمد حفیظ اور شان مسعود کے ناکام ہونے کے بعد سے اظہرعلی اور سمیع اسلم اننگز کا آغاز کررہے ہیں۔لیفٹ آرم اسپنر ذوالفقار بابر بھی ٹیم میں جگہ برقرار رکھنے میں کامیاب نہیں ہوسکے ہیں۔پاکستانی ٹیم ان کھلاڑیوں پر مشتمل ہے۔ مصباح الحق ( کپتان ) اظہرعلی، سمیع اسلم، اسد شفیق، یونس خان، سرفراز احمد۔، محمد نواز، یاسرشاہ، محمد عامر، وہاب ریاض، راحت علی، عمران خان سینئر، سہیل خان، محمد رضوان، بابراعظم اور شرجیل خان۔پاکستانی ٹیم نیوزی لینڈ میں دو ٹیسٹ میچز کھیلے گی۔ پہلا ٹیسٹ سترہ نومبر سے کرائسٹ چرچ میں کھیلا جائے گا۔ دوسرا ٹیسٹ پچیس نومبر سے ہملٹن میں ہوگا۔ دو ٹیسٹ میچوں کی سیریز کا پہلا ٹیسٹ 17 سے اکیس اور دوسرا ٹیسٹ میچ پچیس سے انتیس نومبر تک کھیلا جائیگا۔ چیف سلیکٹر انضمام الحق کا کہنا ہے کہ اسکواڈ کا اعلان نیوزی لینڈ کی کنڈیشنز اور کھلاڑیوں کی کارکردگی کو سامنے رکھتے ہوا کیا گیا ہے۔ اسکواڈ میں تجربہ کار کھلاڑی بھی شامل ہیں جبکہ نوجوان کرکٹرز کو بھی صلاحیتوں کے اظہار کا موقع دیا گیا ہے۔