لاہور ( سپیشل رپورٹر) تنظیم عاشقان رسول کے زیر اہتمام مسجد جعفریہ علی رضا آباد سے لبیک یا رسول اللہ ریلی نکالی گئی۔ ریلی کی قیادت مولانا ممتاز حیدری، مولانا بابر علی بابر، پیر مقدس کاظمی ، غلام مصطفی نیئر، مولانا حسن ہمدانی، مولانا قیصر ہمدانی، دانشن علی نقوی کی قیادت میں کچی کوٹھی،ٹھوکرنیازبیگ ،ہنجروال زینبیہ کمپلیکس ،کھاڑک، سبزہ زار چوک اور یتیم خانہ چوک سے ہوتی ہوئی چھپڑ سٹاپ پر پہنچی۔ اتحاد بین المسلمین کا عملی مظاہرہ کرتے ہوئے میلاد النبیؐ کی تقریب سے اہل سنت اور اہل تشیع علماء نے خطاب کیا۔انہوں نے اتحاد بین المسلمین کی ضرورت پر زور دیتے ہوئے کہا کہ رسول اللہ سے محبت ہماری میراث ہے۔فرانس اور دیگر ممالک میں گستا خانہ خاکوں کی مذمت کی گئی اور کہا گیا کہ پیغمبر کی شان میں ہونے والے گستاخیوں کا توڑ اتحاد بین المسلمین میں ہے ۔ تمام مکاتب فکر اپنے باہمی اختلافات کو بھلا کر کے اتحادامت کی فضا قائم کریں۔