راولپنڈی ( سٹاف رپورٹر) ایم ڈی راولپنڈی ویسٹ مینجمنٹ کمپنی اویس منظور تارڑ نے شہر میں راستوں کی بندش کے باعث صفائی آپریشن میں تعطل کے حوالے سے شہریوں سے تعاون کی اپیل کرتے ہوئے کہا ہے کہ جو نہی راستے کھلتے ہیں راولپنڈی کو زیرو ویسٹ سٹی بنانے میں دیر نہیں لگائیں گے ، راستوں کے بند ہونے سے ہماری کوڑا اُٹھانے والی گاڑیاں شہر کے مختلف مقامات تک پہنچنے سے قاصر ہیں ،جس کے باعث شہریوں کو صفائی کے حوالے سے مشکلات درپیش ہیں اُمید کرتے ہیں کہ وہ بھی ہماری مجبوری کو سمجھتے ہوئے صبر و تحمل کا مظاہرہ کرینگے ۔