دبئی ایئرپورٹ پر اترتے صدر زرداری کا پاؤں فریکچر 

اسلام آباد (نوائے وقت رپورٹ) صدر آصف علی زرداری کے پاؤں میں فریکچر ہوگیا۔ پلاسٹر کے بعد گھر منتقل ہو گئے۔ ڈاکٹروں نے مکمل آرام کا مشورہ دے دیا۔ ترجمان ایوان صدر کے مطابق صدر پاکستان آصف علی زرداری کا گزشتہ رات دبئی ائر پورٹ پہنچنے پر جہاز سے اترتے ہوئے پاؤں فریکچر ہو گیا۔ انہیں فوری طور پر ابتدائی طبی امداد کے لیے ہسپتال منتقل کیا گیا۔ ڈاکٹروں نے چیک اپ کے بعد صدر آصف علی زرداری کے پاؤں پر پلاسٹر کر دیا جو چار ہفتوں کے بعد اتارا جائے گا۔ فضل الرحمن نے بلاول سے ٹیلی فون پر رابطہ کرکے صدر زرداری کی خیریت دریافت کی۔ مولانا فضل الرحمن نے صدر آصف زرداری کیلئے نیک تمناؤں کا اظہار کیا۔