چک امرو، جلالپور جٹاں، شیخوپورہ، جنڈیالہ شیر خان (نامہ نگاران+ نمائندہ خصوصی) ٹریفک حادثات میں ماں بیٹی اور دو سگے بھائیوں سمیت 6 افراد جاں بحق ہوگئے۔ چک امرو میں تھانہ شاہ غریب کی حدود میں موضع چکڑا کے 2 بھائی رضا اور حسنین اپنے ساتھی کے ہمراہ موٹر سائیکل پر گھر جا رہے تھے کہ سامنے سے آنے والی گدھا گاڑی سے ٹکرا گئے۔ دونوں بھائی زخموں کی تاب نہ لاتے ہوئے موقع پر دم توڑ گئے جبکہ انکا تیسرا ساتھی زخمی ہوا۔ سگے بھائیوں کی اچانک موت پر گھر میں کہرام مچ گیا۔ جلالپور جٹاں میں دو موٹر سائیکل سوار نوجوانوں کو تیزرفتار ٹریکٹر نے کچل ڈالا۔ موضع ریحانہ کے شہزاد ملک اور شہزاد اقبال موٹر سائیکل پر کوٹلہ جا رہے تھے کہ رنگپور کے قریب سامنے سے آنے والے تیزرفتار ٹریکٹر سے ٹکرا گئے۔ ٹریکٹر ڈرائیور وقاص موقع سے فرار ہوگیا۔ علاوہ ازیں شیخوپورہ میں ہرن مینار انٹرچینج کے قریب جنڈیالہ روڈ پر تیزرفتار ٹرک اور موٹر سائیکل کے تصادم میں خاتون یاسمین اور اسکی ڈیڑھ ماہ کی بچی ٹرک کے نیچے آکر کچلی گئیں اور موقع پر دم توڑ گئیں جبکہ یاسمین کا شوہر اختر علی حادثے میں معجزانہ طور پر محفوظ رہا۔