کراچی (نیوز رپورٹر) ڈسٹرکٹ سینٹرل کے علاقے نارتھ کراچی اور نارتھ ناظم آباد میں ڈاکوئوں نے ڈکیتی کے دوران مزاحمت پر 3 افراد کو فائرنگ کر کے زخمی کر دیا۔نارتھ کراچی میں لوٹ مار کی فوٹیج سوشل میڈیا پر وائرل ہوگئی جس میں ایک خاتون نے ہمت اور بہادری کا مظاہرہ کرتے ہوئے ڈاکوئوں پر پتھر بھی پھینکے جس کے بعد وہ موقع سے فرار ہوگئے۔تفصیلات کے مطابق نارتھ کراچی کے علاقے بابا موڑ کے قریب ڈاکوئوں نے لوٹ مار کے دوران مزاحمت پر 2 افراد کو فائرنگ کر کے زخمی کر دیا واردات کی فوٹیج سوشل میڈیا پر وائرل ہوگئی جس میں دیکھا جا سکتا ہے کہ موٹر سائیکل سوار ڈاکو ایک گلی میں شہری سے لوٹ مار کر رہے ہیںاس دوران ایک ڈاکو کو پکڑنے کی کوشش کی گئی تو دوسرے ڈاکو نے فائرنگ کر دی جبکہ گلی کے اندر خاتون اور دیگر افراد ڈاکو سے گتھم گتھا بھی ہوگئے اس دوران خاتون نے ہمت اور بہادری کا مظاہرہ کرتے ہوئے فرار ہونے والے ڈاکو کی موٹر سائیکل کو عقب سے پکڑ کر روکنے کی بھی کوشش کی اور ناکامی کے بعد ڈاکوئوں پر پتھر بھی پھینکے جس کے بعد وہ موقع سے فرار ہوگئے۔زخمی ہونے والوں کی شناخت 35سالہ ناصر اور 22 مجاہد کے نام سے کی گئی، دریں اثنا نارتھ ناظم آباد میٹرک بورڈ آفس کے قریب بھی موٹر سائیکل سوار ڈاکوئوں نے ڈکیتی کے دوران مزاحمت پر 20 سالہ افضل کو فائرنگ کر کے زخمی کر دیا۔