عام آدمی کی خوشحالی کا سفرشروع ہوچکا ہے:وزیراعظم 

اسلام آباد: وزیر اعظم شہباز شریف نے ستمبر میں مہنگائی کی شرح 44 ماہ کی کم ترین سطح 6.9 فیصد آنے پر اظہار تشکر کرتے ہوئے معاشی ٹیم کی پذیرائی کی ہے۔اگست 2024 میں 34 ماہ میں پہلی مرتبہ پاکستان میں مہنگائی کی شرح 9.6 فیصد آئی جس کے بعد ستمبر2024 میں مہنگائی کی کم ترین شرح 6.9 فیصد ریکارڈ کی گئی ہے۔وزیر اعظم شہباز شریف نے کہا کہ اللہ کے کرم سے کئے گئے عہد کی پاسداری میں کامیابی ملنا شروع ہوگئی ہے. مہنگائی کی شرح 6.9 فیصد ہونے سے عام آدمی کو ریلیف ملے گا. پیٹرولیم مصنوعات قیمتوں میں مسلسل کمی سےعوام کو ریلیف مل رہا ہے۔وزیراعظم کا کہنا تھا کہ شرح سود کم ہونے سے ملک میں کاروباری سرگرمیوں میں اضافہ ہوگا. مہنگائی کی شرح کو 2025 تک 7 فیصد تک لانے کے ہدف کا 2024 میں ہی حصول قابل ستائش ہے۔شہباز شریف کہتے ہیں کہ پہلے دن سے عوامی ریلیف کے لئے اقدامات کو اولین ترجیح بنایا. پاکستان کے ڈیفالٹ کی خواہش کرنے والوں کا منصوبہ ناکام ہوا جب کہ قوم نے ایک گروہ کی نااہلی کی وجہ سے مشکلات کاٹیں۔وزیراعظم نے مزید کہا کہ ملکی معیشت مستحکم، سفارتی تعلقات مضبوط ہوئے. عام آدمی کی خوشحالی کا سفرشروع ہوچکا ہے۔ آئی ایم ایف پروگرام کے اجراء سے معیشت میں مزید استحکام آئے گا جب کہ ترقی کا سفر 2018 میں جہاں رکا تھا وہیں سے دوبارہ شروع ہوچکا ہے۔