فیصل آباد(نمائندہ خصوصی) ٹریفک اور دیگر حادثات میں بھائی بہن سمیت پانچ افراد جاںبحق اور 11 افراد زخمی ہو گئے‘ جھنگ روڈ پر ڈالہ تیز رفتاری کے باعث بے قابو ہو کر ٹریکٹر ٹرالی سے ٹکرا گیا۔ جس کے نتیجے میں غلام مصطفیٰ اور نامعلوم شخص زخموں کی تاب نہ لاتے ہوئے موقع پر ہی جاںبحق ہو گئے جبکہ ان کے ساتھی امتیاز‘ ریاض‘ عبدالحفیظ، ساجد، بلال، مالا، محمد رضا ساکنان چنیوٹ اور شفیق اور نواز ساکن جھپال شدید زخمی ہو گئے‘ 531 گ ب میں بارش کے دوران گھر کی خستہ حال چھت گرنے سے زلیخا بی بی اور سویرا بی بی‘ تصور اور تیرہ سالہ عمران ملبے تلے دب گئے‘ ریسکیو 1122 ٹیم نے ملبہ ہٹایا تو سویرا بی بی اور اس کا چھوٹا بھائی عمران شدید زخموں کی تاب نہ لاتے ہوئے جاںبحق ہو چکے تھے۔