این اے 128 لاہور کے بیلٹ پیپرز کی کاؤنٹر فائل فراہم نہ کرنے کا الیکشن کمشن حکم کالعدم

اسلام آباد (نوائے وقت رپورٹ) اسلام آباد ہائیکورٹ نے این اے 128 لاہور کے بیلٹ پیپرز کی کاؤنٹر فائل فراہم نہ کرنے کا الیکشن کمشن کا حکم کالعدم قرار دے دیا۔ چیف جسٹس اسلام آباد ہائیکورٹ جسٹس عامر فاروق نے لاہور کے حلقہ این اے 128 کے بیلٹ پیپرز کی کاؤنٹر فائل کی فراہمی سے متعلق درخواست کا تحریری فیصلہ جاری کردیا۔ عدالتی فیصلے میں لکھا گیا ہے کہ درخواست گزار نے بیلٹ پیپرز کی کاؤنٹر فائلز کے حصول کیلئے الیکشن کمشن سے رجوع کیا، الیکشن کمشن نے 26 اپریل کو کاؤنٹر فائلز فراہم کرنے کی درخواست مسترد کی، قانون کے مطابق درخواست گزار کاؤنٹر فائلز کا جائزہ لے سکتا ہے، مصدقہ کاپیز بھی حاصل کر سکتا ہے۔ عدالت نے قرار دیا کہ الیکشن کمشن کا مؤقف بھی ٹھیک ہے کہ این اے 128 کا معاملہ ٹریبونل میں زیر سماعت ہے، الیکشن کمیشن کے مطابق الیکشن ٹریبونل کبھی بھی کاؤنٹر فائلز سمیت تمام ریکارڈ طلب کر سکتا ہے۔ اسلام آباد ہائیکورٹ نے فیصلے میں لکھا کہ الیکشن کمشن کے مطابق کاؤنٹر فائلز کی چھان پھٹک سے دستاویزات آگے پیچھے ہو سکتی ہیں، تاہم الیکشن کمشن کاؤنٹر فائلز کی فراہمی کے حوالے سے ٹریبونل سے اجازت لے سکتا ہے، الیکشن کمشن کاؤنٹر فائلز کے جائزے کے حوالے سے مناسب قوائد و ضوابط بھی عائد کر سکتا ہے۔ فیصلے میں مزید لکھا گیا کہ الیکشن کمشن کے فیصلے کیخلاف درخواست منظور کی جاتی ہے، الیکشن کمشن کا 26 اپریل 2024 کا فیصلہ کالعدم قرار دیا جاتا ہے، الیکشن کمشن کاؤنٹر فائلز کی فراہمی سے متعلق قانون اور عدالتی فیصلے کی روشنی میں فیصلہ کرے۔