لاہور (سپورٹس رپورٹر ) کپتان یاسر شاہ کی تباہ کن باؤلنگ کی بدولت بلوچستان نے خیبرپی کے کو 8 وکٹوں سے ہراکر پاکستان کپ کا ٹائٹل جیت لیا۔یہ پہلی مرتبہ ہے کہ نئے ڈومیسٹک سٹرکچر کی تشکیل کے بعد بلوچستان نے کسی ڈومیسٹک ٹورنامنٹ کا ٹائٹل جیتا ہو۔ چیمپئن ٹیم نے 172 رنز کا ہدف بتیسویں اوور کی دوسری گیند پر 2 وکٹوں پر حاصل کرلیا۔ یاسر شاہ کو پلیئر آف دی فائنل قرار دیا گیا۔مطلوبہ ہدف کے تعاقب میں بلوچستان کے اوپنر عمران بٹ 28 کے مجموعی سکور پر خالد عثمان کی گیند پر آؤٹ ہوکر پویلین واپس لوٹے تو نوجوان بیٹرز عبدالواحد بنگلزئی اور حسیب اللہ نے دوسری وکٹ کیلئے 77 رنز کی شراکت قائم کرکے اپنی ٹیم کی پوزیشن مزید مستحکم کردی۔ حسیب اللہ 45 رنزبناکر آؤٹ ہوئے۔نوجوان عبدالواحد بنگلزئی نے 80 رنز کی ناقابل شکست اننگز کھیلی۔اس سے قبل بلوچستان نے ٹاس جیت کر پہلے فیلڈنگ کا فیصلہ کیا تویاسر شاہ کی نپی تلی باؤلنگ کی بدولت خیبرپی کے ٹیم 46 اوورز میں 171 رنز پر ڈھیر ہوگئی۔کامران غلام کی نصف سنچری رائیگاں گئی۔ 4 کھلاڑی ڈبل فگرز میں بھی داخل نہ ہوسکے۔یاسر شاہ نے 33 رنز کے عوض چار کھلاڑیوں کو آؤٹ کیا۔کامران غلام 91 گیندوں پر 70 رنز بناکر نمایاں رہے۔ ریحان آفریدی ناٹ آؤٹ 27،محمد محسن 21 اور عادل امین 20 رنز بناکر آؤٹ ہوئے۔ٹورنامنٹ کی چیمپئن بلوچستان کوپچاس لاکھ روپے جبکہ رنرزاپ خیبرپی کے کو پچیس لاکھ روپے کی انعامی رقم دی گئی۔ بلوچستان کے اوپنر حسیب اللہ کو پلیئر آف دی ٹورنامنٹ قرار دیا گیا۔بلوچستان کے کپتان یاسر شاہ 24 وکٹیں حاصل کرکے ٹورنامنٹ کے بہترین باؤلر رہے۔ بلوچستان ٹیم کے اوپنر حسیب اللہ 614 رنز بناکر بہترین بیٹر قرار پائے۔خیبرپی کے کے محمد حارث کو بہترین وکٹ کیپر قراردیا گیا۔ انہوں نے ٹورنامنٹ میں 11 کیچز پکڑنے کیساتھ ساتھ 239 رنزبھی بنائے۔