کراچی :فائرنگ اور پرتشدد واقعات میں کمسن بچے سمیت 4 افراد جاں بحق،دوزخمی

  کراچی کے مختلف علاقوں میں فائرنگ اور پر تشدد واقعات میں کمسن بچے سمیت 4 افراد جاں بحق اور 2 خواتین زخمی ہو گئیں۔ پولیس کے مطابق ملیر میمن گوٹھ میں خاندانی تنازعہ پر دو گروپوں میں فائرنگ کا تبادلہ ہوا جس کے نتیجے میں دو افراد جاں بحق اور دو زخمی ہو گئے۔ جاں بحق افراد کی شناخت کرم خان اور محمد بخش کے نام سے ہوئی جبکہ دو خواتین امام بی بی اور زی شیر بی بی زخمی ہوئیں۔ ایس ایس پی ملیر راؤ انوار کے مطابق جائے وقوعہ سے فائرنگ کرنے والے ایک ملزم صادق کو اسلحہ سمیت گرفتار کر لیا گیا ہے۔ تمام افراد کا تعلق بلوچستان سے تھا۔ خاندانی دشمنی پر واقعہ پیش آیا۔ دوسری طرف گارڈن کے علاقے شو مارکیٹ میں گزشتہ رات شہری سے لوٹ مار کے دوران ڈاکوؤں کی فائرنگ سے زخمی بارہ سالہ بچہ اویس دوران علاج دم توڑ گیا۔ اویس پیٹ میں گولی لگنے سے زخمی ہوا تھا اور ہسپتال میں زیر علاج تھا۔ ادھر ہاکس بے روڈ سے ایک شخص کی تشدد زدہ لاش ملی ہے جس کی شناخت نہیں ہوسکی۔ پولیس کے مطابق مقتول کو تشدد کے بعد گولیاں مار کرقتل کیا گیا ہے۔